Со векови, одредени намирници се поврзуваат со страста, заведувањето и сексуалната желба, а некои од нив и денес важат за природен афродизијак.
Секако, не постои храна која преку ноќ ќе го „вклучи“ либидото. Но храната може да влијае врз енергијата, расположението и циркулацијата, а токму тие фактори често имаат улога и во сексуалната желба.
На врвот на листата традиционално се остригите. Нивната репутација како афродизијак е стара со векови, а интересно е што се исклучително богати со цинк, минерал важен за нормалната хормонална и репродуктивна функција.
Веднаш зад нив е храната без која тешко може да се замисли романтична вечер – темното чоколадо. Неговиот вкус и арома одамна се поврзуваат со задоволството, а содржи и соединенија кои се поврзуваат со расположението.
Во друштвото на „љубовната храна“ се и јагодите, смоквите, калинката и авокадото. Смоквите уште во античките времиња биле симбол на плодноста, додека калинката е богата со антиоксиданси и хранливи материи важни за здравјето на крвните садови.
Изненадување на листата може да биде лубеницата. Таа содржи цитрулин – аминокиселина која учествува во процесите поврзани со ширењето на крвните садови.
Ако сакате нешто пожешко, тука се чили пиперките. Капсаицинот, состојката која ја создава нивната лутина, предизвикува чувство на топлина и може привремено да го забрза пулсот. Слична репутација низ историјата имаат и ѓумбирот и циметот, зачини кои традиционално се сметаат за храна што го „загрева“ организмот.
Меѓу зачините посебно место има шафранот. За разлика од многу традиционални афродизијаци, неговото можно влијание врз сексуалната функција е предмет и на научни истражувања, иако не станува збор за магично решение за либидото.
На листата е и мака, растение од Андите кое со векови се користи за издржливост, енергија и сексуална желба.
А што е со секојдневната храна? Бананите, бадемите, оревите, ф’стаците и јајцата обезбедуваат комбинација од протеини, здрави масти, витамини и минерали кои му се потребни на организмот за нормално функционирање и енергија.
Тука се и медот, кој уште од античките времиња е симбол на љубовта и плодноста, како и аспарагусот, кој со векови ја следи репутацијата на афродизијак.
Дури и лукот се наоѓа на ваквите листи. Можеби не е најдобриот избор непосредно пред бакнеж, но неговите активни соединенија се интересни поради нивната поврзаност со здравјето на срцето и крвните садови.
Така, листата од 20 познати природни афродизијаци изгледа вака: остриги, темно чоколадо, јагоди, калинка, смокви, авокадо, лубеница, банани, бадеми, ореви, ф’стаци, чили пиперки, ѓумбир, цимет, шафран, мака, мед, аспарагус, лук и јајца.
Ниту една од нив сама по себе не е гаранција за поголема сексуална желба. Либидото е многу покомплексно и врз него влијаат стресот, сонот, хормоните, здравствената состојба, лековите, расположението и односот со партнерот.
Но ако планирате романтична вечера, чинија со остриги, јагоди и темно чоколадо барем звучи како далеку поинтересен експеримент од обична вечера пред телевизор.
