По објавата дека на вчерашниот протест на белградскиот плоштад Славија имало меѓу 180.000 и 190.000 учесници, студентите во блокада упатија емотивна порака на благодарност до граѓаните кои ги поддржаа.
„Благодарам! Благодарам! Благодарам! И така уште 189.997 пати БЛАГОДАРАМ!“, објавија студентите на социјалните мрежи, изразувајќи благодарност до сите што присуствуваа на собирот.
Проценката ја објави Архива на јавни собири, која наведува дека протестот „Ти и јас, Славија“ собрал меѓу 180.000 и 190.000 луѓе Според нивната анализа, проценката се базира на површина од околу 107.000 квадратни метри и просечна густина од околу 1,7 лице на квадратен метар.
Во соопштението се наведува дека ова е втор најголем протест во Србија од падот на режимот на Слободан Милошевиќ во 2000 година, што дополнително ја нагласува големината и политичката тежина на настанот.
Масовниот собир на Славија, според независните проценки, се вбројува меѓу најголемите политички настани во поновата историја на Србија, додека студентите порачуваат дека поддршката од граѓаните е клучен сигнал за продолжување на нивните активности.
