Летото е време за плажа, море, базени и долги денови на отворено. Сончевата светлина позитивно влијае врз расположението и му помага на организмот да создава витамин Д, но прекумерното изложување на УВ-зраци може да предизвика сериозни здравствени проблеми – од изгореници и предвремено стареење на кожата до зголемен ризик од рак на кожа.
За да уживате во летните денови без непријатни последици, експертите советуваат да се придржувате до неколку едноставни, но важни правила.
Не бркајте темен тен по секоја цена
Многумина го поврзуваат летото со потемнета кожа, но дерматолозите потсетуваат дека тенот е всушност одбранбена реакција на кожата на оштетувањата предизвикани од сончевото зрачење. Наместо што потемна боја, целта треба да биде здрава и заштитена кожа.
Избегнувајте го најсилното сонце
Најголемата концентрација на УВ-зраци е помеѓу 10 и 16 часот. Во овој период најлесно доаѓа до изгореници, дури и кога температурите не се екстремно високи. Затоа престојот на плажа е подобро да се планира во утринските или доцните попладневни часови.
Кремата со заштитен фактор е задолжителна
Стручњаците препорачуваат користење крема со заштитен фактор SPF 30 или повисок, а за светла и чувствителна кожа SPF 50. Кремата треба да се нанесе најмалку 15 минути пред изложување на сонце и повторно на секои два часа, како и по капење или интензивно потење.
Не ги заборавајте најизложените делови од телото
Ушите, вратот, стапалата, усните и темето често остануваат незаштитени, а токму таму најчесто се појавуваат изгореници. Балзам за усни со SPF и шешир со широк обод можат значително да помогнат.
Сенката не е целосна заштита
И под чадор за сонце не сте целосно безбедни. Песокот, водата и бетонските површини ги рефлектираат УВ-зраците, па кремата за заштита останува неопходна и кога сте во сенка.
Пијте доволно течности
Високите температури го забрзуваат губењето течности од организмот. Не чекајте да почувствувате жед – пијте вода редовно. Најдобар избор се водата, незасладените чаеви и овошјето богато со течности.
Носете лесна и заштитна облека
Светлата и лесна облека помага телото полесно да се разладува, а долгите ракави и шеширите обезбедуваат дополнителна заштита. Очила за сонце со УВ-филтер се важни и за здравјето на очите.
Внимавајте ако користите лекови
Одредени антибиотици, лекови против алергии, препарати за акни и некои билни производи можат да ја зголемат чувствителноста на кожата на сонце. Доколку сте на терапија, консултирајте се со лекар или фармацевт.
Децата бараат посебна заштита
Детската кожа е многу почувствителна на сончевите зраци. Бебињата помлади од шест месеци не треба да бидат изложени на директно сонце, а постарите деца треба да користат висок заштитен фактор, шешири и лесна облека.
Слушајте го вашето тело
Црвенило на кожата, главоболка, вртоглавица, гадење или чувство на слабост се сигнали дека сте претерале со изложеноста на сонце. Во таков случај веднаш побарајте сенка, разладете се и внесете доволно течности.
Летниот одмор не мора да биде избор меѓу уживање и здравје. Со неколку едноставни навики можете да ги заштитите кожата, очите и организмот и безгрижно да уживате во сончевите денови.
