Неколку реченици за карактерот понекогаш звучат како да се напишани токму за нас. Психологијата нуди интересно објаснување за ова чувство.

„Сакате сигурност, но понекогаш имате потреба од промена“. „Ви значи мислењето на другите, иако не сакате секогаш да го покажете тоа“. Ваквите описи често се среќаваат во хороскопите и лесно можат да звучат лично и прецизно.

Едно од објаснувањата е таканаречениот Барнумов, познат и како Фореров ефект: склоноста општите описи да ги доживуваме како точен приказ на сопствената личност, особено кога веруваме дека се наменети токму за нас.

Хороскопските текстови често спојуваат особини што не се исклучуваат. Човек може да биде дружељубив, а сепак да сака време за себе; внимателен во некои ситуации, а импулсивен во други. Читателот лесно се присетува на моментите што го потврдуваат описот.

Улога има и селективното паметење. Ако хороскопот најави неочекувана средба, а навистина сретнеме стар познаник, тоа може да ни остане во сеќавање. Предвидувањата што не се оствариле полесно ги забораваме.

Сепак, интересот за хороскопот не мора да значи дека некој го смета за сигурна прогноза. За многумина тој е забава, повод за разговор или мал ритуал што ги поттикнува да размислат за своите желби, односи и планови.

Токму тука е дел од неговата привлечност: во неколку кратки реченици нуди приказна во која можеме да се пронајдеме. А чувството дека некој нè разбира понекогаш е попривлечно од самото предвидување на иднината.