Во свет каде што неколку степени под нулата се доволни за хаос во сообраќајот и затворени училишта, животот во сибирскиот град Јакутск изгледа речиси неверојатно. Овој руски град, познат како најстудениот град на светот, во зимските месеци се соочува со температури што паѓаат и до -64 степени Целзиусови, но за неговите жители тоа е секојдневие.

Меѓу нив е и 32-годишната Сардана, мајка на три деца, која заедно со сопругот Игор ги одгледува децата во екстремни услови што за поголемиот дел од светот би биле незамисливи. Нивниот син Максим има 12 години, ќерката Вика седум, а најмалото бебе Арина имало само месец и половина кога било снимено нивното секојдневие.

Иако надвор владее поларен студ, во нивниот дом температурата достигнува околу 25 степени, па семејството дома носи лесна облека и живее сосема вообичаено. Но секое излегување надвор бара сериозна подготовка – повеќеслојна облека, покривање на секој дел од телото и внимателно следење на времето поминато на студ.

„Во Јакутск, дури и најмалите детали не се прашање на навика, туку на преживување“, објаснува Сардана.

Утрото започнува со истегнување и загревање на телото, нешто што жителите го сметаат за важно пред изложување на екстремниот студ. Воздухот во домовите, пак, често е многу сув поради постојаното греење, што претставува дополнителен проблем, особено за бебињата и малите деца.

Сардана вели дека голем дел од денот го поминува сама со најмалото дете, бидејќи нема помош околу грижата за бебето. Додека сопругот е на работа, а децата на училиште, таа ги завршува домашните обврски и постојано внимава бебето да биде заштитено од огромните температурни разлики.

Една од најнеобичните секојдневни активности е носењето мраз наместо вода. Во Јакутск, жителите често користат големи блокови замрзната вода што ги топат и ги користат за пиење и готвење. Замрзнувачите, пак, речиси и не се потребни – природата ја завршува таа работа сама.

Интересно е и тоа што облеката ја сушат надвор, иако температурите се екстремно ниски. Локалните жители веруваат дека студот помага во уништување на бактериите, па оваа практика е дел од нивната долгогодишна традиција.

Најголем предизвик, сепак, останува движењето со бебе. Сардана ја носи Арина со себе дури и при кратки патувања со автомобил, внимателно облекувајќи ја во повеќе слоеви за ниту еден дел од кожата да не биде изложен на студот.

Животот во Јакутск за многумина изгледа сурово и невозможно место за семејство, но за луѓето таму тоа е дом, рутина и секојдневна борба со природата што ја прифатиле како дел од животот.