По премиерната изведба во Скопје, тимот на АКТО-ФРУ и „Једноставно речено“ гостува во Загреб со перформансот „Железничарот на крајот на светот“, авторски концепт и перформативен радио есеј на Филип Јовановски. Хрватската премиера ќе се одржи на 29 мај во 20:30 часот во Музејот „Никола Тесла“ во Загреб, во рамките на изведбената изложба на Институтот за останки од иднината.
Настанот е организиран по повод 25 години постоење на хрватското здружение „Bacači sjenki“, познато по својата работа во областа на современата уметност, театарот и урбаната култура.
„Железничарот на крајот на светот“ претставува имерзивно патување низ последните 130 години од светската историја, од 1896 до 2026 година. Во перформансот се испреплетуваат работничките и синдикалните борби на железничарите со уметничките движења на 20 век, но и со подемот и заканите од фашизмот низ различни историски периоди.
Публиката во текот на изведбата се наоѓа во затемнет простор, без визуелна перцепција, со што фокусот се префрла на звукот, нарацијата и останатите сетила. Авторите велат дека целта е гледачите не само да го почувствуваат минатото на прогресивните и автономистички движења, туку и да замислат поинаква иднина.
Автор на концептот и сценскиот дизајн е Филип Јовановски, додека перформансот е развиван заедно со Кристина Леловац. Текстот го потпишуваат Кристина Леловац и Максим Никифоровски, а оригиналната музика и звучниот дизајн се дело на Лука Тошев.
Во проектот учествуваат и Мартина Даниловска како изведувачка, Димитар Милев како креативен продуцент и соработник на сценскиот дизајн, како и истражувачки тим составен од Ивана Богичевиќ Леко, Ненад Пинтер, Лука Кнежевиќ Стрика и Максим Никифоровски. Кураторскиот поглед го потпишува Ивана Васева.
Проектот е продукција на „Једноставно речено“ од Белград, во партнерство со лабораторијата „Градот како сцена“ на платформата „Факултет за работи што не се учат“ и „АКТО фестивал за современи уметности“.
