Украинскиот претседател Володимир Зеленски објави дека е целосно задоволен од резултатите на 40-дневната операција на безбедносната служба СБУ, чија цел беше таргетирање на руската воена логистика. Според неговите проценки, финансиската штета за Русија изнесува околу еден билион рубљи, односно 12,2 милијарди долари.

Операцијата започна на крајот на јуни, а заврши на 4 август со координирани напади врз десетици руски танкери што го снабдуваат окупираниот полуостров Крим, како и врз дистрибутивни центри на мрежата Wildberries низ Русија.

Основната цел на овие акции беше истовремено да се ослабат клучните синџири на снабдување на руската армија, но и руското население директно да ги почувствува последиците од војната преку недостиг на стока за широка потрошувачка.

„Апсолутно сум задоволен од резултатите. По нивните напади врз нашата инфраструктура, идентификувавме нови логистички правци и одговоривме соодветно. Загубите за нив се огромни. Тие со години си дозволуваат да напаѓаат невоени цели во Украина, но мора да разберат дека ги знаеме сите нивни слаби точки“, истакна Зеленски во интервју за украинските медиуми.

Тој дополнително предупреди дека Украина детално ги проучила сите руски логистички коридори и најави дека нападите ќе продолжат доколку Москва не ги прекине сопствените удари врз украинската цивилна инфраструктура.

Додека украинските сили се фокусираат врз уништување на противничката логистика, руските сили ги засилија воздушните напади врз големите украински градови.

Во еден од последните ноќни напади врз Киев, загинаа четири лица, меѓу кои и тригодишно дете, додека уште осуммина беа повредени. Овие напади се случуваат во услови кога Украина се соочува со сериозен недостиг на системи и муниција за противвоздушна одбрана.