Институтот за јавно здравје на Србија „Д-р Милан Јовановиќ Батут“ регистрираше 18 потврдени случаи на Западнонилска треска Кај дури 15 пациенти е дијагностицирана потешката, невроинвазивна форма на заболувањето, што бара болничко лекување. Здравствените власти апелираат на засилени мерки за заштита од комарци, особено кај повозрасната популација со хронични заболувања.
Според официјалниот извештај на Институтот „Батут“, најголема концентрација на пријавени случаи има на територијата на главниот град Белград, додека останатите пациенти се регистрирани во Јужнобанатскиот, Јужнобачкиот, Подунавскиот и Сремскиот округ.
Западнонилска треска е сезонско вирусно заболување кое вообичаено се појавува во текот на летото и раната есен. Вирусот не се пренесува со директен контакт меѓу луѓе, туку исклучиво преку убод од заразен комарец од родот Culex, познат како домашен комарец.
Кај приближно 80 проценти од инфицираните лица болеста поминува без никакви симптоми или со блага клиничка слика слична на настинка. Сепак, кај помал процент од пациентите вирусот може да предизвика сериозни невролошки компликации како менингитис и енцефалитис.
Податоците на српските здравствени институции покажуваат дека просечната возраст на хоспитализираните лица со невроинвазивна форма е над 65 години, при што најголемиот дел од нив веќе имале претходни кардиоваскуларни или метаболички заболувања.
Епидемиолозите советуваат граѓаните да користат репеленти при престој на отворено, да носат облека со долги ракави во периодите на најголема активност на комарците и да постават заштитни мрежи на прозорците.
Лекарите препорачуваат секое лице што ќе развие ненадејна висока температура, силна главоболка, вкочанетост на вратот, дезориентација или тремор веднаш да побара стручна медицинска помош.
