Во сите италијански училишта стапи на сила забраната за покривање на лицето, откако претседателот Серџо Матарела го потпиша новиот декрет на десничарската влада на премиерката Џорџа Мелони. Според уредбата, лицата на учениците мора да бидат препознатливи, со што во пракса се забранува носењето бурка и никаб. Мерката е донесена преку итна постапка, а италијанскиот парламент има рок од 60 дена за целосно да ја потврди.

Новиот пакет мерки содржи и ограничувања за составот на паралелките. Почнувајќи од учебната 2027/2028 година, во првите одделенија и години на сите образовни нивоа најмногу 30 проценти од учениците ќе смеат да бидат деца од странско потекло кои немаат доволно познавање на италијанскиот јазик.

Оваа квота ги опфаќа децата без италијанско државјанство, оние што не се родени во земјата и кои немаат поминато најмалку две години во италијанска градинка. За средните училишта критериумот е построг: учениците мора да имаат барем три години претходно образование во Италија за да не влезат во ова ограничување.

Одлуката на Рим опфаќа и одговорност за семејствата. Родителите што имаат сериозни потешкотии со италијанскиот јазик ќе мора да посетуваат задолжителни курсеви доколку јазичната бариера ја попречува редовната комуникација со образовната установа.

Џорџа Мелони, која од 2022 година ја предводи трипартиската коалиција, ги најави овие законски измени на почетокот на септември, по што владата брзо ја усвои уредбата.