Претседателот на Србија, Александар Вучиќ, најави дека во земјата ќе се одржат предвремени избори во следните три до четири месеци, истовремено претставувајќи пакет економски и социјални мерки вреден повеќе од 600 милиони евра.

Во обраќање до јавноста, Вучиќ изјави дека одлуката дали ќе се кандидира за претседател на Владата ќе ја донесе транспарентно и во согласност со Уставот и законите, додавајќи дека јавноста може да ја очекува неговата одлука веќе кон крајот на јули.

Паралелно со политичките најави, српскиот претседател претстави и нов пакет мерки што ќе опфати повеќе од три милиони граѓани. Тој нагласи дека државата ќе продолжи да соработува со Меѓународен монетарен фонд со цел да се зачуваат мерките за ублажување на енергетската криза. Меѓу најавените мерки се еднократна финансиска помош од нешто повеќе од 220 евра за корисниците на социјална помош, поевтини лекови за граѓаните што користат редовна терапија, како и ист износ за примателите на детски додаток.

Дополнително, Владата планира да додели 30.000 туристички ваучери во вредност од по 85 евра за пензионери со пензии до 678 евра, со што ќе бидат опфатени околу еден милион пензионери. Вучиќ најави и можност за значително зголемување на платите и пензиите до крајот на годината, доколку економскиот раст надмине три проценти. Според него, инфлацијата останува под контрола и се движи во рамките на проекциите.

Во обраќањето беше најавено и дека Србија ќе биде целосно подготвена за повторното воведување на задолжителниот воен рок, кој ќе трае 75 дена. Според планот, регрутите ќе започнат со служење од мај следната година, а воените капацитети ќе бидат подготвени за нивен прием.