Единаесет пријави за семејно насилство се регистрирани во изминатото деноноќие низ државата, според информациите на МВР што ги пренесува Рацин. Пријавите се однесуваат на физички напади, закани, следење и вознемирување, а во шест од наведените случаи полицијата уапсила осомничени.

Во струмичко село, ноќта на 7 ноември, бил уапсен 38-годишен маж по пријава дека ја нападнал својата 33-годишна сопруга, а потоа неа и нивните малолетни деца ги истерал од семејниот дом.

Во Велес, полицијата уапсила 45-годишен маж по пријава дека физички ја нападнал и ѝ се заканувал на својата поранешна сопруга.

Пријави за семејно насилство и меѓу поранешни партнери

Во Прилеп, жена пријавила дека поранешниот партнер подолго време ја следел и вознемирувал. Според пријавата, доаѓал на нејзиното работно место, ја следел до домот и ѝ испраќал навредливи пораки.

На подрачјето на Ѓорче Петров, 19-годишник пријавил физички напад и закани од поранешната 17-годишна партнерка. Во пријавата навел и оштетување на влезната врата од домот и на неговиот автомобил.

Во Охрид, 41-годишна жена пријавила дека сопругот телефонски ѝ упатувал навреди и закани додека била на работа.

Апсења во повеќе градови

Во село во општина Ново Село бил уапсен 62-годишен маж по пријава за агресивно однесување кон сопругата.

Полицијата уапсила и 49-годишен маж во Злетово по пријава за физички напад врз партнерката, 42-годишен маж во Гостивар по пријава од сопругата за „телесна повреда“, како и 51-годишен маж во Чаир по пријава дека ја нападнал сопругата.

Во Струмица, 65-годишен маж пријавил агресивно однесување од својот 33-годишен син, кој потоа бил однесен во медицинска установа.

Во скопски Центар, 19-годишна жена пријавила дека татко ѝ упатувал закани кон неа и кон нејзината мајка.

МВР соопштува дека се преземаат мерки за расчистување и документирање на случаите, по што ќе следуваат соодветни поднесоци.

Министерството ги повикува граѓаните да не го премолчуваат насилството. Пријава може да поднесе жртвата, но и секој што има сознанија за насилство, во најблиската полициска станица или на 112 и 192.