Претседателот на Србија, Александар Вучиќ рече дека многу брзо ќе биде соопштен датумот за предвремените избори.
„Секако ќе имаме одлука за десет дена. Нема стапици кога станува збор за избори. Народот, народот одлучува каква иднина сака и кому сака да му ја довери. Мислам дека изборите се многу важна работа. Исто како што отсекогаш велев дека државата не е играчка, изборите се исклучително важни, секогаш“, рече Вучиќ, зборувајќи на ТВ Инфомер синоќа.
Тој додаде дека граѓаните, кога ја избираат својата иднина, мора да ги изберат оние луѓе кои најдобро ќе ги заштитат и зачуваат интересите на земјата.
„Изборите се момент на вистината за сите вклучени во оваа работа, но тоа е првенствено прашање за иднината на земјата и иднината на народот, а не за нас“, нагласи Вучиќ.
Вучиќ додаде и дека не станува збор за неговата судбина, лична или туѓа, туку дека е прашање на милиони луѓе во оваа земја.
Претседателот на Србија изјави дека изборите ќе се одржат оваа година, кога е најповолно за државата.
„Изборите ќе се одржат оваа година, кога најмалку ќе ѝ наштетат на државата, кога е најповолно за државата“, рече Вучиќ.
