Организацискиот комитет на Олимписките и Параолимписките игри во Лос Анџелес 2028 ги отвори апликациите за волонтери, а Македонскиот олимписки комитет упати покана до сите заинтересирани граѓани од Македонија да станат дел од олимпиското движење. Пријавувањето се врши преку официјалниот портал на игрите, а организаторите бараат 60.000 луѓе кои ќе помогнат во реализацијата на овој масовен спортски настан.
Право на аплицирање имаат сите лица кои ќе имаат најмалку 18 години во моментот на поднесување на пријавата. Задолжително е добро познавање на англискиот јазик во зборување, читање и пишување, бидејќи тоа е официјалниот работен јазик на организацијата.
Кандидатите мора да бидат достапни за најмалку 10 смени, со времетраење од околу осум часа по смена, за време на Олимписките или Параолимписките игри. Смените не мора да бидат последователни.
Поголемиот дел од позициите се лоцирани во Лос Анџелес, но волонтерски ангажмани ќе има и во Оклахома Сити, Њујорк, Колумбус, Нешвил, Сент Луис, Сан Хозе и Сан Диего. За учество не е потребно американско држајанство ниту дозвола за престој во САД.
Волонтерските позиции не се платени, а организаторот не ги покрива трошоците за патување, сместување и превоз. Сите апликанти сами ги сносат финансиските трошоци за престојот.
За полнувањето на апликацијата се потребни околу 30 минути. Кандидатите можат да наведат три претпочитани области за работа, како спортски операции, логистика, медицинска поддршка, технологија или медиуми. За одредени специфични улоги, како возачи или медицински кадар, потребно е соодветно претходно искуство.
По првичната селекција во 2027 година, избраните кандидати ќе поминат низ процес на проценка и задолжителна обука, која ќе се одвива онлајн и со физичко присуство.
