Пентагон првпат објави конкретна проценка за цената на војната во Иран. Според американскиот одбранбен функционер Џулс Херст, конфликтот досега ги чинел САД околу 25 милијарди долари, а најголем дел од сумата се однесува на потрошена муниција.
Податокот беше изнесен на сослушување пред Комитетот за вооружени сили на Претставничкиот дом, каде сведочеше и американскиот министер за одбрана Пит Хегсет. Тоа беше негово прво појавување пред Конгресот од почетокот на војната против Иран.
Хегсет пред пратениците го бранеше барањето на администрацијата на Доналд Трамп за одбранбен буџет од 1,5 билиони долари за фискалната 2027 година. Тој рече дека предлогот на претседателот „ја одразува итноста на ситуацијата“ и дека Белата куќа сака да ја врати американската одбранбена индустрија „на воена основа“.
Министерот за одбрана рече дека е подготвен за дебата за Иран, но го повтори ставот на Трамп дека САД нема да дозволат Техеран да развие нуклеарно оружје.
„Најголемите противници со кои во моментов се соочуваме се непромислените, неефикасни и дефетистички изјави на демократите во Конгресот“, изјави Хегсет.
На прашањето како Белата куќа планира да го принуди Иран на нов нуклеарен договор, Хегсет одговори дека САД мора да го доведат Техеран до точка во која ќе седне на преговарачка маса и ќе се откаже од нуклеарните амбиции.
Тој тврдеше дека американските и израелските напади минатата година ги уништиле иранските нуклеарни капацитети, но дека Иран и натаму има „нуклеарни амбиции“ и „конвенционален штит од илјадници ракети“.
Сослушувањето привлече големо внимание затоа што ова е првпат министерот за одбрана и началникот на Здружениот штаб да се појават пред конгресен одбор откако САД и Израел ја започнаа војната против Иран.
Демократите бараат одговори за стратегијата, количината употребено оружје и вкупните трошоци на конфликтот. Во Конгресот расте незадоволството бидејќи, според американскиот Устав, само Конгресот може да одобри војна, а во овој случај не бил консултиран ниту гласал за воена акција.
Загриженоста дополнително расте поради влијанието на војната врз глобалната и домашната економија, особено врз цените на горивото и храната.
