Виолинистката Наз Ирем Туркмен и македонската пијанистка Марија Вршкова ќе настапат во понеделник, 28 септември, во 20 часот, во Музејот на македонската борба во Скопје. Концертот е дел од 49. издание на „Денови на македонска музика“, а влезот е слободен.

На програмата се дела од Ахмед Аднан Сајгун, Сони Петровски, Томислав Зографски, Филип Иванов и Фазил Сај. Со изборот на автори, концертот ќе ги поврзе македонското и турското музичко творештво.

Наз Ирем Туркмен е родена во Истанбул во 2006 година и студира виолина на Универзитетот „Моцартеум“ во Салцбург. Таа е добитничка на награди на меѓународни натпревари за млади виолинисти, а како солистка настапувала со повеќе оркестри во Турција.

Марија Вршкова е пијанистка со долгогодишна солистичка и камерна кариера. Значаен дел од нејзината работа е посветен на современата музика: досега извела повеќе од 50 светски премиери на дела од македонски и странски композитори. Таа е добитничка на наградата „Георги Божиков“ на СОКОМ, а работи како вонреден професор и продекан за концертна дејност на Факултетот за музичка уметност во Скопје.