Германскиот производител на батерии „Варта“, еден од најпознатите брендови во Европа, прогласи стечај поради сериозни финансиски проблеми. Компанијата најави намалување на производната програма и реструктуирање, додека доверителите бараат издвојување на профитабилниот бизнис со батерии за широка потрошувачка.
„Варта“ вработува околу 3.260 луѓе, а според последните достапни финансиски податоци, во 2024 година остварила приходи од над 790 милиони евра, но и загуба од околу 64,5 милиони евра. Освен батерии за секојдневна употреба, компанијата произведува микробатерии и системи за складирање енергија.
Дополнителен удар за компанијата беше одлуката на „Епл“ да ја прекине соработката со фабриката во Нердлинген, која ќе биде затворена оваа есен. Погонот вработува околу 350 лица, а не беа пронајдени нови големи купувачи што би го замениле американскиот технолошки гигант.
Од компанијата наведуваат дека кризата е резултат на слабата побарувачка, влошените пазарни услови, неповолните девизни курсеви и губењето на клучниот клиент. Постапката за стечај ги опфаќа матичната компанија и неколку нејзини оперативни подружници.
И покрај тешката состојба, индустриските аналитичари сметаат дека „Варта“ сè уште располага со значаен технолошки потенцијал. Компанијата работи на развој на натриум-јонски батерии, кои се сметаат за една од перспективните технологии за идните системи за складирање енергија во Европа. Сепак, за продолжување на тие проекти ќе бидат потребни значителни нови инвестиции.
