Унгарската влада донесе одлука повторно да го забрани увозот на украински земјоделски производи, со образложение дека мерката треба да ги заштити домашните земјоделци и безбедноста на снабдувањето со храна.

Одлуката ја објави премиерот Петер Маѓар на платформата „Икс“, наведувајќи дека владата истовремено ја повлекува и претходната намера на Унгарија да се повлече од Меѓународниот кривичен суд.  

Според владината уредба, забраната опфаќа широк круг производи од Украина, меѓу кои месо, јајца, мед, зеленчук, пченица, ’рж, јачмен, пченка, брашно, сончоглед, масло за јадење и вино.  

Ова е најновиот потег во низата мерки со кои дел од земјите од Централна и Источна Европа се обидуваат да го ограничат увозот од Украина, тврдејќи дека евтините украински производи создаваат притисок врз домашното земјоделство.

Забраната беше повторно воведена откако претходните ограничувања, воведени за време на владата на Виктор Орбан, истекле поради процедурална грешка поврзана со промената на власта и истекот на вонредните мерки.  

Унгарскиот министер за земјоделство и прехранбена економија, Саболч Бона, порача дека владата нема да дозволи увоз од Украина или од други земји да ја загрози егзистенцијата на унгарските земјоделци и снабдувањето со безбедна храна за потрошувачите.  

Паралелно со оваа одлука, владата на Маѓар го повлече планот за напуштање на Меѓународниот кривичен суд, што претставува промена во однос на политиката на претходната влада на Орбан. Унгарија претходно најави повлекување од МКС во 2025 година, по реакциите околу налогот за апсење на израелскиот премиер Бенјамин Нетанјаху