Украинците објавија снимки од Кримскиот мост: Се урна ли дел од конструкцијата?

Украинските медиуми тврдат дека во новиот напад се урнал еден од големите лакови на патниот дел од мостот. Обемот на штетата сè уште не е независно потврден, а руските власти го потврдија нападот и повторно го запреа сообраќајот.

Украинските сили втора ноќ по ред го нападнаа Кримскиот мост, стратешки важната сообраќајна врска меѓу Русија и окупираниот Крим. Украинските медиуми објавија дека по најновиот напад се урнал еден од големите лакови на патниот дел од мостот, заедно со дел од коловозот.

Објавени се и снимки од наводното уривање, но размерите на штетата засега не се независно потврдени. Руските власти го потврдија новиот напад и повторно го прекинаа сообраќајот преку мостот.

Мостот беше оштетен и во понеделникот, кога сообраќајот беше во прекин речиси 17 часа. Станува збор за една од најважните сообраќајни врски за снабдување на руските сили во јужна Украина.

Во меѓувреме, Русија продолжува со нападите врз украинските градови и енергетската инфраструктура. Меѓународните тела за нуклеарна безбедност предупредуваат дека оштетувањето на електроенергетската мрежа го зголемува ризикот од нуклеарна несреќа во текот на зимата.

Нови информации за нападите во регионот

Според руските власти, две лица загинале во украински напад со беспилотни летала врз окупираниот Крим. Информацијата ја објави Сергеј Аксјонов, гувернерот на полуостровот поставен од Москва. Тој не прецизираше дали жртвите настрадале во нападот врз мостот или на друга локација на Крим.

Во меѓувреме, голем пожар избувнал во рафинеријата „Газпром нефтехим Салават“ во Русија, по наводен украински напад со дронови врз овој стратешки комплекс.

Руското Министерство за одбрана тврди дека соборило рекордни 1.336 украински беспилотни летала. Според извештаите, украинските сили целеле кон Керчкиот мост и рафинерии, додека Москва продолжува со нападите врз украинската енергетска инфраструктура.

Во Црното Море, товарен брод што превезувал 3.000 тони пченица потонал по наводен напад со дрон во близина на бугарскиот брег. Бродот „Бетул 8“, кој пловел под сомалиско знаме од Романија кон Египет, бил погоден во бугарската ексклузивна економска зона, на околу 74 километри од ’ртот Калијакра. Сите 12 членови на екипажот, турски државјани, биле спасени.

Предупредување за зголемен ризик од нуклеарна несреќа

Меѓународните тела за нуклеарна безбедност предупредуваат дека ризикот од нуклеарна несреќа во Украина се зголемува поради руските напади врз енергетската инфраструктура. Предупредувањето го упатија регулаторни организации што претставуваат 38 земји, меѓу кои сите членки на Европската Унија, САД, Обединетото Кралство, Канада и Јапонија, пренесува Ројтерс.

„Изразуваме длабока загриженост поради сè поголемите ризици за нуклеарната безбедност што произлегуваат од руската војна против Украина и континуираните напади врз енергетската инфраструктура на земјата“, се наведува во заедничкото соопштение.

Регулаторите предупредуваат дека на нуклеарните централи им е потребно стабилно снабдување со електрична енергија за да можат да го ладат нуклеарниот материјал. Доколку останат без струја, се зголемува опасноста од прегревање, топење на јадрото на реакторот и можно испуштање радиоактивни материи во животната средина.


Тие ја повикаа Русија итно да ги прекине нападите врз украинските нуклеарни постројки и енергетската инфраструктура неопходна за нивното безбедно функционирање. Предупредувањето го објавија три организации: ХЕРКА, која ги обединува европските тела надлежни за заштита од зрачење, ВЕНРА, здружение на западноевропски нуклеарни регулатори, и НОРА, која ги обединува нордиските тела за нуклеарна безбедност.

е-Трн да боцка во твојот инбокс