Јапонското олабавување на правилата за извоз на оружје отвора простор за преговори кои еден ден би можеле да доведат до тоа Токио да испорача воена опрема за Украина во борбата против руската инвазија, изјави украинскиот амбасадор во Јапонија, Јуриј Лутовинов, во интервју за Ројтерс.
„Тоа ни овозможува да разговараме. Теоретски, тоа е многу голем чекор напред“, рече Лутовинов. Потегот на премиерката Санае Такаичи од минатата недела, со кој се олеснува извозот на оружје, претставува најново отстапување на Јапонија од нејзиниот строг пацифистички став и предизвика голем интерес во време кога војните во Украина и на Блискиот Исток ја оптоваруваат западната индустрија за оружје.
Иако ревизијата на правилата и натаму задржува контроли за извоз во зони на конфликт, дозволува исклучоци кога тоа им служи на безбедносните интереси на Токио, па Киев се надева дека може да има корист. Јапонија ја поврзува судбината на Украина со сопствената безбедност, особено во контекст на растечката воена моќ на Кина и загриженоста околу Тајван.
„Ако Украина падне, ќе имаме голем домино-ефект. Затоа Индо-Пацификот и европскиот континент се неразделни од гледна точка на нашата безбедност“, рече Лутовинов. Јапонското Министерство за надворешни работи и кабинетот на премиерката не одговориле веднаш на барањата за коментар, а Такаичи јавно не дала сигнал дека би поддржала извоз на оружје за Украина.
За поблиска иднина, украинскиот амбасадор вели дека Токио би можел да помогне во финансирање на развојот на украински систем за противвоздушна одбрана, со што Киев би ја намалил зависноста од американските ракети „Патриот“, кои ги има сè помалку. „Имаме сè што е потребно за производство. Но, ни требаат инвестиции. Ни требаат средства“, рече тој.
Во тек се и разговори Јапонија да придонесе кон НАТО-програмата PURL, преку која се финансира купување американска опрема за Киев. Лутовинов додаде дека јапонските компании би можеле да ѝ помогнат на Украина да ги диверзифицира изворите на електроника и микрокомпоненти потребни за илјадниците дронови што ги користи на бојното поле.
