Вишото јавно обвинителство во Белград соопшти дека Веселин Милиќ, началник на Полициската управа на градот Белград, е уапсен под сомнение за сторени две кривични дела во врска со исчезнувањето на А.Н. на 12 мај во Белград.
Според ВЈО, Милиќ бил уапсен во продолжение на операцијата за разјаснување на околностите под кои А.Н. исчезнал на 12 мај 2026 година.
„На В.М. му е одредена мерка притвор до 48 часа поради постоење основи на сомнение дека сторил кривични дела Непријавување кривично дело и сторител и Помагање на сторител по извршувањето на кривичното дело, во кој рок ќе биде доведен на распит пред вршителот на должноста јавен обвинител“, се наведува во соопштението.
Седум лица, меѓу кои и тројца полицајци, беа претходно уапсени во врска со исчезнувањето на А.Н. Како што објави РТС, уапсените полицајци биле дел од обезбедувањето на Милиќ.
Исчезнувањето на А.Н. го пријавила неговата сопруга, која рекла дека последен пат слушнала од него на 12 мај, кога тој бил во ресторан во белградската населба Сењак.
Според неофицијални информации, СВ го застрелал А.Н. во ресторанот, а злосторството било прикриено. ВЈО претходно објави дека СВ и неговата сопруга, која му донела пиштол во ресторанот, се меѓу уапсените.
