Рибарски брод што пловел под турско знаме бил нападнат и потонал кај северниот брег на Црното Море, при што еден морнар загинал, а четворица се повредени, соопшти турската крајбрежна стража.

Бродот „Дуру 67“ бил нападнат западно од Севастопол, на Крим, во петокот, се наведува во соопштението на Командата на турската крајбрежна стража.

Во соопштението не се наведуваат дополнителни детали за тоа кој го извршил нападот, ниту под какви околности бил погоден бродот.

Петмина повредени морнари биле спасени од друг рибарски брод, „Бурак Каја“. Еден од нив, сепак, починал за време на враќањето кон Турција.

Брод на крајбрежната стража со медицински тим пристигнал до „Бурак Каја“ на 213 километри северно од турското пристаниште Инеболу, по што повредените биле префрлени на пловилото на крајбрежната стража.

По 15 часа пловење кон Турција, повредените биле пренесени во болница во Кастамону, административниот центар на истоимената провинција.

Директорот на покраинската здравствена служба, Февзи Јавузјилмаз, изјави дека повредените имаат рани од шрапнели и дека еден од нив бил подложен на помала хируршка интервенција уште на бродот на крајбрежната стража.

„Двајца пациенти имаат релативно лесни повреди, додека кај уште двајца повредите се нешто посериозни“, изјави тој.

Засега никој не презел одговорност за нападот.

Инцидентот повторно ја зголемува загриженоста за безбедноста на пловидбата во Црното Море, регион кој останува под силно влијание на воените тензии и ризиците за цивилни и трговски бродови.