Турција би можела да учествува во операциите за расчистување мини во Ормускиот Теснец по евентуален мировен договор меѓу Иран и САД, изјави турскиот министер за надворешни работи Хакан Фидан.
Во изјава за новинарите во Лондон, Фидан рече дека по евентуален договор се очекува да биде формиран технички тим за отстранување мини од Ормускиот Теснец.
Според него, Турција во принцип гледа позитивно на ваквите активности, кои ги смета за хуманитарна обврска, објави „Ројтерс“.
Фидан појасни дека операциите за деминирање би ги спроведувал технички тим составен од претставници на неколку земји. Тој додаде дека Турција „нема да има проблем“ да учествува во такви операции доколку тие се реализираат по договор меѓу Иран и САД.
Сепак, турскиот министер предупреди дека Анкара би можела да го преиспита својот став доколку идната техничка коалиција стане дел од евентуален нов конфликт.
Фидан оцени и дека прашањата поврзани со иранската нуклеарна програма би можеле да се решаваат во следната рунда преговори во Пакистан, пренесува „Политика“.
