Филмската екипа мора секогаш да биде безбедна при снимањето, им порача режисерот Трифун Ситниковски на младите учесници на 14. Младински филмски фестивал „Џифони Македонија“ во Скопје. На претпоследниот ден од фестивалот, во киното „Фросина“ и Кинотеката, учесниците ги финализираа проектите од работилниците и разговараа со домашни и странски автори за предизвиците на сетот, независната анимација и етичките прашања што ги отвора технологијата.
Ситниковски пред средношколците го претстави краткиот филм „Шега“, современа адаптација на истоимениот расказ на Антон Павлович Чехов. Додека изворната приказна од 19 век се одвива на санка спуштена по снежен рид, режисерот дејството го преместил на железничка станица, поврзувајќи го рускиот класик со лични искуства на неговата генерација.
Снимањето на локација со активна железничка инфраструктура барало посебна претпазливост, особено во кадри каде возот минува непосредно над главите на актерите. Токму поради овие сцени, Ситниковски пред кадетите и сениорите подвлече дека грижата за тимот и строгите безбедносни протоколи се предуслов за секоја филмска продукција.
Аниматорот Гоце Господиновски пред публиката го изложи долгиот процес зад неговиот краток анимиран филм „Неми филмови“. Станува збор за нискобуџетен проект што се развивал седум години, исклучиво со поддршка од семејството и најблиските соработници.
Филмот веќе забележа успеси и признанија на меѓународни фестивали специјализирани за анимација. Господиновски пред младите шеговито додаде дека неговите деца буквално пораснале додека траела продукцијата, илустрирајќи ја упорноста што ја бара авторскиот анимиран филм без големи продуцентски буџети зад себе.
Вниманието на средношколците во „Фросина“ го привлече и филмот „Кучињата немаат соништа“ на режисерот Ханис Багашов, снимен со кинематограферот Фејми Даут. Заедно со актерот Дениз Рустеми, Багашов одговараше на прашања за начинот на градење на ликовите и естетиката на приказната во која игра и актерката Ера Балај.
Паралелно со разговорите за практичната режија, програмата Creative You(th) Talks отвори дебата за брзиот развој на технологијата преку документарецот „Кој те создаде“ (Who Made You) на финската авторка Ирис Харма. Преку разговори со научници и прикази на интеракции меѓу луѓе и роботи, остварувањето нуди увид во етичките и општествените промени што ги носи автоматизацијата.
