Оперската класика „Травијата“ од италијанскиот композитор Giuseppe Verdi ќе биде изведена на 27 мај со почеток од 20 часот на сцената на Национална опера и балет, како дел од 54. издание на фестивалот Мајски оперски вечери.
Станува збор за едно од најпознатите и најизведувани оперски дела во светот, создадено во 1853 година според романот Дамата со камелии од Alexandre Dumas fils. Операта ја следи трагичната приказна за Виолета Валери и нејзината љубов со Алфред Жермон, отворајќи теми за љубовта, жртвата, моралот и судирот со општествените норми.
Со претставата ќе диригира унгарскиот диригент Gergely Kesselyák, додека режијата е на германската режисерка Verena Stoiber. Сценографијата и костимите ги потпишува Sofia Schneider, кореограф е Саша Евтимова, концерт-мајстор Јане Бакевски, а хор-мајстор Јасмина Ѓоргеска.
Во главната улога на Виолета Валери ќе настапи грузиската сопранистка Tea Purtseladze, додека улогата на Алфред Жермон ќе ја толкува италијанскиот тенор Alessandro Fantoni. Во улогата на Жорж Жермон ќе настапи монголскиот баритон Badral Chuluunbaatar.
Во останатите улоги настапуваат Марика Поповиќ, Александра Лазаровска Василевски, Кристијан Антовски, Драган Ампов, Никола Стојчевски, Невен Силјановски, Игор Гиновски и Тихомир Јакимовски, заедно со хорот, оркестарот и балетскиот ансамбл на Националната опера и балет.
„Травијата“ останува едно од најсилните музичко-сценски дела во оперската историја, препознатливо по емотивната музика, драматичната приказна и арии кои со децении се дел од светскиот класичен репертоар. Со новата продукција, фестивалот „Мајски оперски вечери“ продолжува да носи меѓународни уметнички соработки и големи класични наслови пред домашната публика.
