Доналд Трамп ги отфрли предупредувањата на истражувачите дека вештачката интелигенција претставува егзистенцијална закана за човештвото. Заминувајќи од Далас во четвртокот вечерта, американскиот претседател изјави дека воопшто не стравува од сценарија за уништување на луѓето. Неговата единствена грижа, како што наведе, е Соединетите Американски Држави да не заостанат зад Кина во развојот на оваа технологија.

Одговарајќи на новинарско прашање за ризиците што ги посочуваат дел од научниците, Трамп беше дециден дека таквите сценарија не го оптоваруваат.

„Не, ниту малку не ме загрижува тоа“, рече Трамп пред новинарите во Далас. „Ме загрижува дека ќе се најдеме во лоша позиција ако не победиме во развојот на вештачката интелигенција. Во моментов имаме значителна предност пред Кина.“

Реакцијата на претседателот уследи по дебатата што ја предизвика поранешен истражувач од компаниите „Anthropic“ и „OpenAI“. Тој јавно алармираше дека водечките технолошки корпорации си поигруваат со иднината на човештвото. Според неговите наводи, дел од инженерите стравуваат дека технологијата може да стане фатална за луѓето пред крајот на оваа деценија.

Ставот на Белата куќа не наиде на едногласна поддршка ниту кај сопартијците на Трамп. Дел од републиканските претставници во Конгресот отворено заземаат повнимателен курс.

Сенаторот од Тексас Тед Круз, кој раководи со сенатскиот Комитет за трговија, претходно изјави за „Политико“ дека ризиците поврзани со развојот на напредните системи се длабоко загрижувачки.

Загриженоста кај законодавците од двете партии дополнително порасна по серијата инциденти во кои одредени автономни софтверски системи самостојно иницираа хакерски напади, што ги засили барањата за итно воведување строги регулативи.