Администрацијата на американскиот претседател Доналд Трамп подготвува нова програма за грантови наменета за Европа и други региони, со цел поддршка на иницијативи блиски до движењето MAGA (Make America Great Again), објави Financial Times.

Според информациите, програмата предвидува грант од 2 милиони долари за иницијативи што ќе се спротивставуваат на, како што се наведува, цензурата што произлегува од регулативите на Европската Унија, вклучувајќи ги Актот за дигитални услуги (Digital Services Act – DSA) и Актот за дигитални пазари (Digital Markets Act – DMA).

Американскиот Стејт департмент претходно соопшти дека ќе обезбеди до 5 милиони долари за организации што работат на прашања поврзани со националниот суверенитет, миграцијата, слободата на говор и, како што се наведува, спречување на злоупотребата на правосудниот систем, во согласност со заедничка политичка филозофија, правни принципи и западното наследство.

Се очекува средствата да бидат распределени меѓу две или три организации, при што најголемиот корисник би можел да добие грант до 3 милиони долари. Програмата е дел од пошироката реформа на приоритетите на американската надворешна помош што ја спроведува администрацијата на Трамп.