Доналд Трамп најави казни за Канада поради лошо управување со шумите по бранот пожари што го зафатија американскиот северен сосед и предизвикаа загадување на американските градови. Научниците веднаш реагираа со оценка дека климатските промени и историските емисии од САД се вистинската причина за горењето на шумите.

Бранот големи шумски пожари ова лето принуди илјадници жители во Канада да ги напуштат домовите и уништи стотици куќи, пред сè во областа Британска Колумбија и источната провинција Онтарио. Екстремните температури, сувиот воздух и силните ветрови овозможија брзо ширење на пламенот.

Густиот чад се прошири преку границата и зафати повеќе американски сојузни држави. Во Њујорк и Детроит властите издадоа предупредувања за лош квалитет на воздухот, а некои деловни субјекти привремено го прекинаа работењето.

Американскиот претседател изјави дека Канада не се справува соодветно со контролата на шумите и најави дека веќе донел одлука за преземање чекори. Трамп посочи дека чадот прави директна штета на американската економија и граѓаните, обвинувајќи ги канадските власти за неспособност да се справат со ситуацијата.

Според неговите тврдења, со подобро разредување и одржување на шумите, пожарите немаше да достигнат вакви размери. На прашањата за деталите од мерките, тој најави дека одлуката набрзо ќе биде објавена.

Меѓународниот тим истражувачи од мрежата World Weather Attribution објави студија која покажува дека климатските услови кои доведоа до пожарите во Онтарио сега се очекуваат на секои шест години, за разлика од прединдустрискиот период кога беа исклучително ретки.

Експертите нагласуваат дека американската индустрија низ историјата ослободила најголема количина на стакленички гасови преку согорување нафета, јаглен и гас. Тие посочуваат дека голем дел од канадските шуми се во недостапни северни региони каде брзината на горење на иглолисните дрвја не остава простор за реакција на противпожарните екипи, без оглед на методологијата на управување.