Американскиот претседател Доналд Трамп на втората вечер од републиканската конвенција во Далас приреди необична сцена, откако од присутните побара да кренат десна рака и да повторат заклетва поврзана со претстојните избори.

Трамп прво ги повика своите поддржувачи да се заколнат дека ќе излезат на гласање со своите семејства и пријатели. Во изјавата, меѓу другото, ги повика да гласаат без оглед на тоа дали се регистрирани и употреби израз со кој се повикува на „мамење“ на изборите. Потоа ја продолжи импровизираната заклетва пред публиката.

„Можете да гласате и за демократите“

Трамп им порача на присутните дека на 3 ноември мора да излезат и да гласаат, додавајќи дека, доколку сакаат, можат да го дадат својот глас и за демократските кандидати. Сепак, веднаш потоа се пошегува дека не очекува некој во салата да гласа за Демократската партија.

„Знаете ли што се случува ако не гласате? Одите во пекол“, им порача Трамп на присутните, додавајќи дека не сака такво нешто да им се случи.

Сцената предизвика внимание поради необичниот начин на кој претседателот ги мотивираше своите симпатизери да излезат на избори. По говорот, во салата почна да свири оперска музика, додека од таванот паѓаа балони. Водителот на програмата потоа ги повика присутните безбедно да се вратат дома.

Втората вечер од републиканската конвенција во Далас го означува влегувањето во завршницата на кампањата за конгресните избори во 2026 година. Примарните избори веќе завршија, а до гласањето за составот на американскиот Конгрес остануваат околу два месеца.