Поранешниот унгарски премиер Виктор Орбан вечерва со својата сопруга го посети Милорад Додик, претседател на СНСД и поранешен претседател на Република Српска. Додик на социјалната мрежа Икс (X) објави фотографии од нивното дружење и порача дека му е чест што го угостил својот долгогодишен пријател.
„Моето семејство и јас вечерва сме почестени од посетата на големите пријатели, Виктор Орбан и неговата сопруга“, напиша Додик покрај фотографијата со Орбан, на која во позадина се гледа ражен. „Вистинските пријатели се пријатели за цел живот, а мојот пријател Виктор и неговото семејство се токму такви пријатели“, додаде тој.
Додик наведе и дека му ја пренел благодарноста на српскиот народ на Орбан за сè што за време на својот премиерски мандат направил за Република Српска.
Средбата се случува откако двајцата политичари останаа без функциите што ги извршуваа со години. Орбан ја изгуби власта по парламентарните избори во Унгарија на 12 април годинава. Неговата партија Фидес претрпе пораз од партијата Тиса, предводена од Петер Маѓар, со што беше ставен крај на 16-годишното владеење на Орбан.
Маѓар ја презеде премиерската функција во Унгарија на 9 мај, откако неговата партија освои двотретинско мнозинство во парламентот.
Додик остана без функцијата претседател на Република Српска минатата година, по правосилната пресуда на Судот на Босна и Херцеговина поради непочитување на одлуките на високиот претставник за БиХ.
Орбан за време на својот мандат отворено го поддржуваше Додик, вклучително и во периодите на неговите конфликти со државните институции на Босна и Херцеговина и со меѓународната заедница.
Унгарија под владата на Орбан развиваше блиски политички и економски односи со Република Српска, вклучително и соработка во земјоделството и енергетиката.
Додик за возврат редовно го истакнуваше Орбан како еден од своите најважни европски сојузници. По изборниот пораз на Орбан, Додик изгуби важен политички партнер на чело на земја членка на Европската Унија.
Со вечерашната приватна средба, двајцата политичари покажаа дека ги задржале блиските лични односи и по заминувањето од власта. Додик не објави за кои теми разговарале, ниту пак најави конкретни политички договори.
