Бизнис империјата на семејството на американскиот претседател Доналд Трамп бележи засилени врски со индустријата за вештачка интелигенција, токму во период кога тој се противи на повиците за забавување на развојот на оваа технологија. Анализа на „Вашингтон пост“, заснована врз официјалните финансиски пријави, покажува дека Трамп има директен финансиски интерес во секторот, со што критичарите отвораат прашања за конфликт на интереси додека Белата куќа креира регулативи за технолошкиот пазар.

Финансиските извештаи откриваат речиси 30.000 трансакции со хартии од вредност на сметките поврзани со Трамп од неговото враќање во Белата куќа. Наместо да го пренесе својот имот во независен фонд (слеп траст), како што правеа претходните претседатели, тој продолжи активно да тргува.

Меѓу купените хартии од вредност се наоѓаат акции од компании што произведуваат полупроводници, компјутерски сервери и придружна инфраструктура неопходна за големите јазични модели. Во пријавите се наведени купувања на удели во гиганти како „Дел“, „Микрон“, „Џенерал електрик Вернова“, „Бродком“, „Тексас инструментс“, „Кредо технолоџи“ и „Супер микро компјутер“. Засега не е познато дали тој сè уште ги поседува сите овие удели, бидејќи законите не наложуваат јавно објавување на секоја продажба во реално време.

Критичарите и организациите за етика предупредуваат дека ваквата состојба овозможува претседателот директно да профитира од сопствените одлуки за дерегулација на технологијата. Секоја државна субвенција или одлука против ограничување на развојот на вештачката интелигенција автоматски влијае на вредноста на инфраструктурните гиганти во неговото портфолио.

Администрацијата во Вашингтон ги отфрла обвинувањата. Портпаролот на Белата куќа, Дејвис Ингл, изјави дека со сите инвестициски сметки раководат независни менаџери. Според него, тргувањето се врши преку компјутерски модели кои следат признати берзански индекси, па семејството Трамп нема директно влијание врз изборот на компаниите што се купуваат или продаваат на берзата.