ТикТок трајно ја суспендираше рекламната сметка на филмот непосредно пред неговото пошироко кино-прикажување.

Новиот документарец за милијардерот Илон Маск повторно ја отвори дебатата за моќта на големите технолошки компании и нивното влијание врз информациите што стигнуваат до јавноста.

Според „Варајети“ и „ТекКранч“, ТикТок ја суспендирал рекламната сметка поврзана со документарецот „Musk“, во режија на оскаровецот Алекс Гибни.

Филмот трае приближно три часа и 45 минути и ги истражува деловниот подем на Маск, неговото политичко влијание, управувањето со компаниите и контроверзиите што го следат.

Дистрибутерот „Bleecker Street“ соопштил дека суспензијата дошла во периодот кога филмот го проширувал прикажувањето во американските кина.

Но, ТикТок не е единствената платформа на која документарецот наишол на пречки.

Рекламите првично биле одбиени и од Мета и Јутјуб, иако двете платформи подоцна го смениле ставот. Платформата Икс, која е во сопственост на Маск, исто така не прифатила рекламирање на филмот.

Самиот Маск јавно го критикувал документарецот и неговиот режисер.

Каде завршуваат правилата, а почнува цензурата?

Технолошките платформи имаат право да поставуваат правила за рекламирање, особено кога станува збор за политички содржини. Но, случајот отвора прашање за транспарентноста на тие правила.

Ако неколку од најголемите интернет-платформи одлучат да не промовираат одреден филм, неговата видливост може значително да се намали, дури и кога тој е легално достапен во кината.

Контроверзијата околу „Musk“ покажува колку дистрибуцијата на информации денес зависи од приватни компании кои управуваат со дигиталниот простор.