Протести и тензии беа регистрирани во Хаг и во Приштина по објавувањето на првостепените пресуди за четворицата поранешни високи функционери на Ослободителната војска на Косово.
Специјализираните совети на Косово го осудија поранешниот косовски претседател Хашим Тачи на 25 години затвор за воени злосторства. Јакуп Красниќи, исто така, доби казна од 25 години, Кадри Весели беше осуден на 18, а Реџеп Селими на 13 години затвор.
Пред судот во Хаг се собраа голем број поддржувачи на обвинетите, кои носеа албански знамиња и обележја на ОВК. По соопштувањето на пресудите, дел од демонстрантите се судрија со полицијата.
На снимките објавени од холандските медиуми се гледа интервенција на специјалната полиција и употреба на воден топ. Според првичните медиумски извештаи, неколку лица биле приведени откако се обиделе да го пробијат полицискиот кордон. Официјален податок за бројот на приведени засега не е објавен.
Het is compleet uit de hand gelopen bij het Internationaal Gerechtshof in Den Haag, waar vele Albanezen en Kosovaren zich verzamelden om steun te betuigen aan Kosovo's oud-president Hashim Thaçi. Thaçi kreeg een gevangenisstraf van 25 jaar, waarna de onrust buiten de rechtbank… pic.twitter.com/DeJ8dR5OnN
— PowNed (@PowNed) September 16, 2026
Протести беа одржани и во Приштина, каде што голем број граѓани го следеа изрекувањето на пресудите на јавни собири. Одлуката на судот беше пречекана со свирежи и негодување, а безбедносните сили беа распоредени околу повеќе институции.
Дел од регионалните медиуми објавија дека имало инциденти во близина на седиштето на ЕУЛЕКС, но информациите за директен напад врз објектот засега не се потврдени од мисијата или од косовската полиција.
Тачи и тројцата поранешни команданти беа прогласени за виновни за незаконско затворање, тортура, сурово постапување и убиства извршени во текот и непосредно по војната во Косово во 1998 и 1999 година. Судот утврди дека жртвите биле цивили и лица сметани за политички противници или соработници на српските власти.
Обвинетите беа ослободени од обвиненијата за злосторства против човештвото, бидејќи судскиот совет оцени дека не е докажано постоењето широк или систематски напад врз цивилното население.
Сите четворица претходно се изјаснија за невини, а нивните адвокати најавија жалби. За многу косовски Албанци поранешните водачи на ОВК се национални херои, поради што судскиот процес и пресудите предизвикаа силни реакции во Косово.
Судот, пак, нагласи дека предмет на постапката не биле ОВК како организација или борбата за независност на Косово, туку индивидуалната кривична одговорност на обвинетите.
Извори: Ројтерс, Асошиејтед прес и Специјализираните совети на Косово.
