„Театар за тебе“ одбележа три години работа со повеќе од 30.000 посетители, околу 300 изведби на првата детска претстава „Супер Вселенко и роденденската торта“ и богата програма за деца, млади и возрасни. Од основањето до денес, независниот театарски колектив создаде повеќе од 15 претстави за деца и три претстави за возрасна публика, организираше стотици роденденски анимации и гостуваше во повеќе градови низ Македонија и надвор од неа. Јубилејот беше одбележан на 27 јуни во „Паблик рум“ во Скопје, со пријатели, соработници, публика и поддржувачи.
Во изминатите три години, „Театар за тебе“ изгради репертоар што опфаќа детски и возрасни претстави, креативни и едукативни работилници, тим билдинг програми, интерактивни настани и роденденски анимации. Денес колективот работи со тим од околу десет професионални актери, драматурзи, психолози, педагози, фотографи и видеографи, кои секојдневно ја носат театарската приказна до различна публика.
Посебно место во развојот на театарот има претставата „Супер Вселенко и роденденската торта“, која стана препознатлив белег на колективот. Со околу 300 изведби, оваа претстава стигна до илјадници деца и родители и помогна „Театар за тебе“ да изгради директна врска со најмладата публика.
Третиот роденден беше прославен во пријатна атмосфера, со музика, дружење и многу убави моменти. Настанот во „Паблик рум“ беше и можност за премиерно претставување на првата колекција со производи на „Театар за тебе“, уште еден креативен чекор со кој колективот ја проширува својата приказна и надвор од сцената.
Покрај постојаниот тим, низ проектите на „Театар за тебе“ учествувале и бројни актери и соработници, кои дале свој придонес во развојот на колективот. Токму таквата отворена соработка е важен дел од неговата мисија — создавање простор во кој независната сцена може да расте, да експериментира и да допре до нови публики.
Со своите претстави и активности, „Театар за тебе“ гостуваше во Велес, Куманово, Демир Капија, Гевгелија, Делчево, Богданци, Кратово, Охрид и Виница, а настапуваше и надвор од државата, во Србија и Германија. Во периодот што следува се планирани нови меѓународни гостувања, со цел македонската независна театарска сцена да се претстави пред уште поширока публика.
„Овие три години се доказ дека со многу љубов, посветеност и верба може да се создаде простор каде што уметноста е достапна за сите. Горди сме на секое дете што се смеело во нашите претстави, на секој гледач што ја споделил својата приказна со нас и на секој соработник што помогнал ‘Театар за тебе’ да расте. За нас, театарот не е само претстава — тоа е место каде што се создаваат спомени, се отвораат разговори и се градат заедници“, изјави Изабела Јакимова, основачка на „Театар за тебе“.
Продуцентката Сара Томевска вели дека најголемиот успех на колективот не се само бројките, туку довербата од публиката.
„Кога ќе погледнеме наназад, најголем успех не се само бројките, туку довербата што ја добивме од публиката. Зад секоја претстава, секој роденден и секоја работилница стојат луѓе кои веруваат во тоа што го создаваме. Токму таа доверба нè мотивира да продолжиме да растеме, да создаваме нови претстави, да им даваме простор на младите уметници и да ја претставуваме македонската независна театарска сцена и надвор од границите на државата“, изјави Томевска.
Во својата четврта година, „Театар за тебе“ влегува со нови претстави, нови авторски проекти, нови меѓународни гостувања и амбиција уште повеќе да ја доближи театарската уметност до децата, младите и возрасната публика.
Трите години се значајна пресвртница за колективот, но уште повеќе се поттик да продолжи да создава приказни што остануваат долго по последниот аплауз.
