Гевгелија од 11 до 13 септември ќе биде домаќин на четвртото издание на гастрономско-музичкиот фестивал Taste the South. Тродневната манифестација на паркингот кај Новиот пазар „Сава Михајлов“ ќе ги обедини традиционалната јужна кујна, домашните винарии и настапите на познати македонски изведувачи. Публиката ќе дегустира локални специјалитети подготвени на лице место, со целодневна програма прилагодена за сите генерации.
Фестивалската програма започнува во петок во 17:00 часот, додека музичкиот дел стартува во 18:30 часот со фолклорните друштва ЗГУД „Негорци“ и ЗГУД „Браќа Толеви“. Вечерта продолжува со Филип Стојанов, „Пауза за ракија“, поп-составот „Куку Леле“ и полноќен настап на духовиот состав „Брас Брадарс“.
Првиот ден во фокус го става ајварот. Посетителите ќе го следат процесот на подготовка на отворено и ќе дегустираат свежо приготвен домашен намаз.
Вториот фестивалски ден е посветен на автохтониот симбол на гевгелискиот крај, смоквите и деликатесите од нив. Локалните производители ќе презентираат традиционални рецепти типични за југот.
Музичкиот распоред стартува во 18:30 часот со настап на КУД „Танец“ од Миравци, а потоа следуваат „Леге артист“ и Кико Болеро со својот бенд. Главниот дел од саботната вечер им припаѓа на групата „Нокаут“ од 21:30 часот и тандемот Игор Џамбазов и „Гуру Харе“, кои ќе настапат пред полноќ.
Неделата стартува напладне, во 12:00 часот, а програмата на сцената почнува во 14:00 часот со младите инструменталисти од Школата за гитари и Школата за тапани при Пионерскиот дом. Попладнето настапуваат Ансамбл „Бојмија“, групата „Мистик“ и детскиот фестивал „Калинка“.
Гастрономскиот акцент во недела паѓа врз македонската ракија и презентациите на домашните винарии. Завршната вечер ја отвора Наталија Данаилова во 19:45 часот, трап-дуото „Два Бона“ се качува на сцената во 21:00 часот, а фестивалот го затвора концертот на Каролина Гочева закажан за 22:30 часот. Модератори на тридневните збиднувања се „Диверзија“ и Марко „Дај побрзај“.
