Еден танкер бил погоден со проектили од непознато потекло додека пловел на околу 78 наутички милји северно од Фуџајра во Обединетите Арапски Емирати, соопшти UKMTO. Според информациите, сите членови на екипажот се безбедни, а нема ниту еколошка штета.
Инцидентот доаѓа само ден откако мали бродови нападнале товарен брод во Ормускиот теснец, што дополнително ги зголемува тензиите во регионот. По почетокот на конфликтот меѓу САД, Израел и Иран, Техеран презеде контрола врз теснецот, речиси целосно блокирајќи го сообраќајот низ оваа клучна рута.
Стотици бродови заглавени
Според податоците на Меѓународната поморска организација, стотици бродови и околу 20.000 морнари остануваат заробени во теснецот од почетокот на кризата.
Во меѓувреме, американските сили воведоа поморска блокада на иранските пристаништа, што дополнително ја комплицира ситуацијата.
САД подготвуваат голема операција
Доналд Трамп најави почеток на операција за извлекување на бродовите од теснецот, која ја нарече „хуманитарна“.
Според CENTCOM, во акцијата ќе учествуваат околу 15.000 војници, над 100 летала и бројни воени бродови и дронови.
Целта е да се „врати слободата на пловидба“ низ Ормускиот теснец – клучна артерија за глобалната трговија со нафта и гас.
