Пејачката Тамара Тодевска денес во просториите на „Аудиокултура“ во Скопје одржа промотивно преслушување на својот нов албум „Кукла жива“, кој за првпат излегува на винил. На средбата присуствуваа соработници, музички професионалци и новинари, кои во целост ги слушнаа десетте нови композиции пред нивното официјално претставување пред пошироката јавност. (53 зборови)

На материјалот за „Кукла жива“ се работеше речиси цела година, а проектот обедини повеќе од 60 инструменталисти и автори под раководство на Емин Џијан. Идејата за целиот концепт потекнува од Коста Петров, кој заедно со Џијан присуствуваше на промотивното слушање и разговараше со гостите за продукциските детали и креативниот процес зад секоја песна.

„Многу сум горда на тоа што го создадовме. Сакав денес едноставно да ја слушаме музиката заедно и потоа искрено да разговараме за неа. Ми значи што ‘Кукла жива’ сега добива и свој живот на винил“, изјави Тодевска.

По преслушувањето на винилното издание, следниот чекор на Тодевска е враќањето на големата сцена. Таа најави целовечерен концерт на 7 декември 2026 година во спортскиот центар „Борис Трајковски“ во Скопје.

Настапот ќе се одржи под мотото „25 години љубов“ и ќе послужи како концертна промоција на новиот материјал, надополнет со песните со кои таа настапуваше во изминатите две и пол децении. Влезниците за настанот се веќе пуштени во продажба преку нејзината официјална веб-страница.