Песната „Take My Breath Away“, во изведба на бендот Берлин, е објавена во јуни 1986 година како дел од саундтракот на филмот „Топ Ган“. Ја напишале продуцентот Џорџо Мородер и текстописецот Том Витлок, а на 13 септември 1986 година стигнала на првото место на американската листа Billboard Hot 100. Годинава се навршуваат точно 40 години од тој момент. Песната освои Оскар и Златен глобус за најдобра оригинална филмска песна, што беше третиот Оскар во кариерата на Мородер.
Од диското до синтпопот
Џорџо Мородер, роден како Хансјорг Мородер на 26 април 1940 година во Ортизеи, во регионот Јужен Тирол во Италија, се смета за еден од пионерите на електронската денс-музика. Во седумдесеттите години, неговата соработка со Дона Самер на песни како „Love to Love You Baby“ и „I Feel Love“ помогна да се дефинира ерата на диското, а целосно синтетизираниот звук на „I Feel Love“ подоцна беше препознаен како директен претходник на техно-музиката. Во Минхен, Мородер го основал студиото Musicland, во кое снимале и Rolling Stones, Led Zeppelin, Queen и Елтон Џон.
Трет Оскар, по „Полноќен експрес“ и „Флешденс“
„Take My Breath Away“ му го донела на Мородер третиот Оскар за најдобра оригинална песна. Претходно ја освоил истата награда, во категоријата за најдобра оригинална музика, за филмот „Полноќен експрес“ во 1978 година, а потоа и во 1984 година, за песната „Flashdance… What a Feeling“, изведена од Ајрин Кара за филмот „Флешденс“. Според изјава на самиот Мородер, токму „Take My Breath Away“ е делото во неговата кариера на кое најмногу се гордее, повеќе дури и од неговите познати диско-хитови.
Издавачката куќа Columbia Records првично предложила песната да ја пее некој од веќе потпишаните изведувачи на куќата, меѓу кои и Алисон Мојет, но Мородер на крајот се одлучил за бендот Берлин, чија претходна песна „No More Words“ самиот ја имал продуцирано. Текстописецот Том Витлок направил неколку измени на текстот пред пејачката Тери Нан да ги сними вокалите. Песната станала една од ретките во дискографијата на Берлин што не ја напишал басистот на бендот, Џон Кроуфорд.
Втор сингл од саундтракот, прв на листите
„Take My Breath Away“ бил вториот сингл издаден од саундтракот на „Топ Ган“, по „Danger Zone“ во изведба на Кени Логинс, но токму тој станал поголем светски хит. Освен што се искачил на првото место во САД, песната била број еден и во Обединетото Кралство, Холандија и Ирска, второ место во Франција, Шведска, Австралија и Швајцарија, а четврто во Австрија и Норвешка. Во САД, синглот добил златен статус. Песната се нашла и на албумот на Берлин „Count Three & Pray“, издаден истата, 1986 година.
И покрај огромниот успех на песната, албумот „Count Three & Pray“ имал послаба продажба, а бендот Берлин се распаднал во 1987 година. Тери Нан подоцна, во 1999 година, го реформирала бендот со целосно нова постава.
Песната доживеала нов бран на популарност во октомври 1990 година, кога била повторно издадена по повод првото телевизиско емитување на „Топ Ган“ на британската телевизија ITV. Истовремено, била искористена и во телевизиска рекламна кампања на Пежо за моделот 405.
