Директорот на СЗО за Европа, Ханс Клуге, ги повика владите низ континентот да ги третираат екстремните горештини како сериозна здравствена криза и да ги зајакнат здравствените системи пред нови температурни пикови. Во порака објавена на социјалната мрежа X, Клуге истакна дека подготовката за топлотни бранови мора да биде „оперативна“, со мерки како ослободување болнички капацитети, заштита на ризични пациенти, обезбедување системи за ладење и стабилно напојување со електрична енергија.

Тој предупреди дека здравствените служби веќе се под сериозен притисок поради високите температури кои на делови од Европа надминуваат 40°C. Во Франција, итните служби пријавиле четирикратно зголемување на случаи поврзани со топлотен удар, дехидрација и други компликации предизвикани од жештините.

Во Обединетото Кралство, Лондонската служба за итна помош соопшти дека имала најзафатен ден досега, со речиси 8.900 итни повици во еден ден. Дел од болниците прогласија критична состојба поради дефекти во системите за ладење, што дополнително ја отежна работата на медицинскиот персонал. Здравствените експерти предупредуваат дека најзагрозени се постарите лица и хронично болните, кај кои ризикот од сериозни последици значително се зголемува при екстремни температури.