Екстремните летни температури и повеќенеделната суша му нанесоа штета од најмалку 36 милијарди евра на германското стопанство, покажува најновата проценка на еколошката организација Гринпис. Оваа сума претставува меѓу 0,8 и 0,9 отсто од вкупната економска активност на водечката европска економија.

Според анализата на финансискиот експерт на Гринпис, Маурисио Варгас, најголемата поединечна загуба произлегува од падот на работната продуктивност. Околу 25 дена со екстремни горештини предизвикаа загуби од 10,8 милијарди евра поради намален учинок и зголемени отсуства од работа.

Шумските пожари и сушниот стрес врз природата направија штета помеѓу 5 и 7,5 милијарди евра, додека здравствениот систем и загубите поврзани со здравјето се проценуваат на дополнителни 6,9 милијарди евра.

Критично нискиот водостој на главните пловни патишта, пред сè на реката Рајна, принуди делумен прекин на внатрешниот речен транспорт. Поради ограничената пловидба, директни последици претрпеа индустриите зависни од масовен дотур на суровини, како што се хемиската индустрија, секторот за челик и нафтената и преработувачката индустрија.

Од Гринпис предупредуваат дека оваа сума претставува само долна граница на штетата и повикуваат на итни структурни инвестиции во климатска заштита и прилагодување на инфраструктурата, бидејќи трошоците од неделување значително ги надминуваат превентивните буџети.