Во Малта започна судскиот процес против малтешкиот бизнисмен Јорген Фенек, кој е обвинет дека стои зад убиството на истражувачката новинарка Дафне Каруана Галиција, убиена во експлозија на автомобил-бомба во октомври 2017 година. Обвинителството бара доживотна затворска казна за Фенек, кој ги негира сите обвиненија.

Според обвинителите, Фенек преку посредник им исплатил околу 150.000 евра на извршителите за да ја ликвидираат новинарката, која со години истражувала случаи на политичка и финансиска корупција во Малта. Клучен сведок во процесот е посредникот Мелвин Теума, кој добил помилување во замена за соработка со истрагата и обезбедил снимени разговори што обвинителството ги смета за важен доказ.

Каруана Галиција беше меѓународно позната по своите истражувања за корупција, перење пари и врските меѓу политиката и бизнисот, вклучително и откритијата поврзани со „Панамските документи“. Нејзиното убиство предизвика силни реакции во Европа, масовни протести во Малта и сериозна политичка криза што доведе до оставка на тогашниот премиер Џозеф Мускат.

Фенек беше уапсен во 2019 година додека со јахта се обидувал да ја напушти Малта. Неговиот судски процес беше одложуван со години поради правни постапки и жалби, а сега пред порота ќе се разгледуваат обвиненијата за соучесништво во убиство и злосторничко здружување. Судењето се очекува да трае неколку недели.

Досега пет лица веќе се осудени за нивната улога во убиството, меѓу кои извршителите и лицата што го обезбедиле експлозивот. Фенек е последниот од обвинетите кој се соочува со судење, а исходот од процесот се смета за еден од најважните тестови за владеењето на правото и борбата против корупцијата во Малта.