Незадоволството од трошоците за студирање и неизвесната иднина ги изведе студентите во Албанија на улица. Протестот на 13 октомври пред Министерството за образование во Тирана беше проследен со судири, приведувања и употреба на солзавец и водени топови. Дел од демонстрантите фрлаа тули и бетонски блокови кон зградата на министерството, објави Ројтерс.

Зад протестите стојат барања за подобри услови на универзитетите, попристапни школарини и поголеми можности за вработување. Студентите повикаа и на бојкот на наставата на 14 октомври, како и на продолжување на собирите со вклучување млади од други градови, пренесува „Коха“.

Образованието како трошок, заминувањето како излез

Независниот албански медиум „Citizens.al“ известува дека една од главните пораки на протестот била оти младите одбиваат да молчат пред проблемите што ги принудуваат да ја напуштат земјата. Учесници побарале квалитетно и бесплатно јавно образование и се спротивставиле на односот во кој универзитетот ги третира студентите како клиенти.

На собирот присуствувале и учесници во студентските протести од 2018 година. Организаторите повторно ги отворија тогашните барања, тврдејќи дека тие не се целосно исполнети. Така, сегашната мобилизација го враќа прашањето колку се промениле условите за студирање во изминатите осум години.

Судири и обвинувања за полициско насилство

Албанскиот јавен сервис РТШ извести дека демонстранти скршиле прозорци и ги отстраниле оградите пред министерството, а полицијата интервенирала со водени топови. На протестот се слушале и барања за оставки на премиерот и министерката за образование, како и пораки дека без младите нема иднина за Албанија.

„Citizens.al“, пак, известува за полициско насилство врз демонстрантите. Овие обвинувања се значаен дел од случувањата, покрај документираните напади врз зградата и оштетувањето на имотот.

Вицепремиерката Албана Кочиу ја осуди насилната ескалација и порача дека нападите врз институциите и полицијата не се решение.

Студентите најавуваат продолжување на протестите. Нивните барања повторно го ставаат во центарот на јавната расправа прашањето дали високото образование во Албанија им обезбедува реална перспектива на младите.