Почетокот на учебната година за многу родители носи уште една грижа, зголемен број инфекции меѓу децата. Во училиштата и градинките вирусите и бактериите полесно се шират, а децата можат да бидат преносители и пред да се појават симптоми. Мачнина, повраќање, болки во стомакот и дијареја се меѓу најчестите симптоми на стомачните инфекции.
Течностите се најважни при повраќање и дијареја
Ако детето има полесни симптоми, е релативно витално, нема висока температура и може да внесува храна и течности, вообичаено може да се следи и третира дома, според советите на лекарот. Клучен момент е да не дојде до дехидратација. Затоа детето треба да внесува доволно течности, особено ако има повраќање или дијареја. Но, постојат знаци поради кои родителите треба да побараат медицинска помош.
Докторите предупредуваат дека загрижувачки се изразена малаксаност, сувост на кожата, променет изглед на очите, обложен јазик, висока температура, одбивање храна, а особено одбивање течности. Во такви случаи педијатарот може да процени дали е потребна дополнителна терапија, вклучително и инфузија.
Антибиотиците, пак, не делуваат на вирусните инфекции и не треба да се користат на своја рака. Според педијатарот, тие се потребни само во одредени ситуации, кога постои бактериска инфекција или специфична компликација.
Нема сируп што може целосно да го „зајакне“ имунитетот
Со почетокот на сезоната на инфекции, родителите често посегнуваат по витамини, сирупи и додатоци во исхраната со надеж дека така ќе го спречат разболувањето. Но, според лекарите, не постои препарат или суплемент кој со сигурност може да го направи детето отпорно на инфекции.
Многу поголемо значење имаат секојдневните навики, разновидна и здрава исхрана, доволно сон и основните хигиенски мерки. Педијатарите препорачуваат околу осум часа сон, а истовремено предупредува дека со суплементите не треба да се претерува, бидејќи кај некои деца можат да предизвикаат несакани реакции, вклучително и алергии или дијареја.
Болното дете треба да остане дома
Еден од наједноставните начини за ограничување на ширењето на инфекциите е детето со симптоми да не оди во училиште, градинка или друг колектив. Важна е и редовната хигиена на рацете. Децата треба да се научат при кивање и кашлање да ја покриваат устата и носот со свиткан лакт, наместо со дланките, за да се намали можноста за пренесување на микроорганизми преку допир.
Според искуството на педијатарот, следниот период би можел да донесе поголем број стомачни и респираторни инфекции. Сепак, не секој симптом што личи на вирус е нужно инфекција. Во периодот кога концентрацијата на полен од амброзија е зголемена, дел од тегобите кај децата може да бидат поврзани и со алергии.
Затоа, особено кај деца со посилни или продолжени симптоми, важно е родителите да не поставуваат дијагноза сами, туку да се консултираат со педијатар.
