Според најновите безбедносни предупредувања на британското Министерство за надворешни работи (FCDO), повеќе земји во светот остануваат исклучително ризични за патување поради тероризам, вооружено насилство, киднапирања и политичка нестабилност.
На врвот на листата е Авганистан, каде што ризикот од терористички напади и долгогодишно задржување во затвор се оценува како многу висок. И покрај тоа, на социјалните мрежи, особено TikTok, постојат милиони објави под хаштагот #afghanistan, каде дел од инфлуенсерите ја прикажуваат земјата во сосема поинакво, туристички привлечено светло.
Хаити се соочува со екстремно високо ниво на криминал, вооружени грабежи, киднапирања и насилни протести, при што банди често поставуваат лажни контролни пунктови и барикади. Во групата на високоризични земји се и Буркина Фасо, Мали и Нигер, каде што активни се терористички групи и чести се киднапирања на странци, додека државите се под власт на воени хунти. Иран е оценет како земја со сериозни безбедносни ризици поради тензии со САД и Израел, затворен воздушен простор и можност за апсење на двојни државјани.
Русија е исто така наведена како ризична, со предупредувања за можни терористички напади на јавни места, во контекст на војната во Украина. Сирија, Јемен, Ирак и Палестина остануваат меѓу најнестабилните региони во светот, со активни вооружени конфликти, терористички групи и висок ризик од киднапирања.
Белорусија е наведена поради ризик од апсење поврзано со политички активности, додека Јужен Судан се соочува со секојдневно вооружено насилство и опасности на патиштата. Во овие региони, безбедносните ризици не се ограничени само на тероризам, туку вклучуваат и насилни кражби, сексуално насилство, конфликти меѓу вооружени групи и целосна институционална нестабилност.
И покрај тоа, некои специјализирани туристички агенции организираат патувања во вакви региони за авантуристи, користејќи информации во реално време и локални контакти. Сепак, најголем дел од патниците се придржуваат до официјалните препораки и ги избегнуваат овие дестинации.
