Бројот на регистрирани бродови што минуваат низ Ормускиот Теснец за време на викендот се сведе на едвај пет дневно поради зачестените напади врз трговските пловила, објави новинската агенција Ројтерс. Странските бродари воведуваат екстремни мерки на претпазливост, па реалната бројка на пловила на оваа клучна нафтена рута можеби е поголема, со оглед на тоа што екипажите масовно ги исклучуваат автоматските системи за идентификација за да избегнат таргетирање.
Податоците на аналитичката компанија „Кплер“ покажуваат дека сообраќајот низ теснецот деновиве е сведен речиси исклучиво на помали пловила. Меѓу ретките регистрирани бродови беа и два танкери за течен нафтен гас, од кои едниот се движеше по иранската рута, додека вториот исплови целосно непријавен кон Индија.
Во петокот низ рутата помина и супертанкер со два милиони барели катарска сурова нафта. Бродот излезе од теснецот со целосно исклучен транспондер, што стана стандардна практика за заштита од напади.
Британската воена организација за поморска трговија (УКМТО) соопшти дека во саботата еден танкер бил директно погоден со непознат проектил при преминот низ теснецот. Ова претставува трет регистриран напад врз трговски бродови во текот на изминатата седмица.
Безбедносната состојба во Заливот дополнително се заостри откако американските сили во неделата извршија напад врз два ирански ракетни лансери лоцирани на островот Ларак, кој има стратешка позиција во самиот Ормуски Теснец.
