Српската полиција почна да користи дронови за ловење сообраќајни прекршоци

За само пет дена во меѓународната акција на мрежата РОАДПОЛ (ROADPOL) на патиштата во Србија се регистрирани 6.199 прекршоци од товарни возила и автобуси.

Припадниците на Министерството за внатрешни работи на Србија (МВР) воведоа надзор со дронови за откривање сообраќајни прекршоци кај тешките товарни возила, при што за првите пет дена од акцијата се евидентирани вкупно 6.199 прекршоци. Контролите се спроведуваат на државните патишта во рамките на засилената акција на европската мрежа на сообраќајни полиции РОАДПОЛ, која трае до недела, 22 ноември.

Сообраќајната полиција во Србија ги насочи беспилотните летала на конкретни делници од државните патишта каде што со сообраќајна сигнализација е строго забрането престигнување за товарни возила со максимална дозволена маса над 3,5 тони. Дроновите овозможуваат преглед од воздух на прекршоците што често остануваат незабележани од класичните патроли на терен.

Секој возач кој ќе биде снимен и затекнат во прекршок веднаш се запира од полициските службеници на терен. По запирањето, возилата подлежат на детална техничка и административна проверка за почитување на целокупните сообраќајни прописи.

Статистиката од првите пет дена на акцијата покажува висок број прекршоци кај професионалните возачи на српските патишта. Од вкупно 6.199 откриени прекршоци, дури 5.924 се направени од возачи на товарни возила, додека 275 прекршоци се евидентирани кај возачи на автобуси.

Покрај непрописното престигнување, полициските тимови вршат засилена контрола врз примената на Законот за работно време на екипажот на возилата во патниот превоз и исправноста на тахографите. Против сите возачи кај кои се утврдени неправилности се поднесени соодветни прекршочни пријави.

Засилениот надзор во Србија е дел од координираната акција за контрола на товарни возила и автобуси што ја организира европската мрежа РОАДПОЛ (ROADPOL) во вкупно 34 земји членки. Оваа организација ги обединува сообраќајните полиции на европските држави со цел намалување на бројот на загинати и тешко повредени лица на патиштата преку синхронизирани контроли на клучните транзитни коридори.


Од српското Министерство за внатрешни работи соопштија дека интензивните контроли ќе продолжат и по завршувањето на тековната акција в недела, со цел да се зголеми безбедноста на сите учесници и да се спречат сообраќајни незгоди со најтешки последици.

е-Трн да боцка во твојот инбокс