Владата на Словенија донесе одлука за целосно укинување на привремените гранични контроли на границите со Хрватска и Унгарија, мерка која официјално стапува на сила точно на полноќ. Како што пренесува хрватскиот медиум „Индекс“, повикувајќи се на изјавата на словенечкиот министер за внатрешни работи Франци Матоз, полициските сили комплетно се повлекуваат од поранешните гранични премини, а надзорот во иднина ќе се спроведува преку поинакви и поефикасни облици на полициско работење.
Вршителот на должност главен директор на словенечката полиција, Данијел Лорбек, потврди дека полициските службеници на полноќ ќе ги напуштат премините, ќе ја изменат сообраќајната сигнализација за да овозможат непречен проток на возила и во целост ќе ја отстранат поставената техничка опрема, што директно ќе придонесе за намалување на гужвите на патиштата во пресрет на летната туристичка сезона.
Словенечките власти уверуваат дека овој потег нема да ја загрози безбедноста на државата, туку напротив, ќе ја подобри ситуацијата на теренот. Според министерот Матоз, досегашното пасивно седење на полицајците во куќарките било фискално и оперативно непродуктивно, со оглед на тоа што илегалните преминувања на границите и дејствијата на шверцерите со мигранти во реалноста се случуваат надвор од официјалните гранични точки.
Ослободените полициски капацитети сега ќе бидат мобилизирани за спроведување на ненадејни и насочени контроли во внатрешноста, што се очекува да донесе многу подобри резултати во борбата против прекуграничниот криминал на западнобалканската рута каде оваа година е забележан зголемен миграциски притисок.
Ваквата одлука на Љубљана доаѓа во согласност со препораките на Европската комисија која неодамна побара од Словенија и уште осум други членки на Шенген зоната постепено да ги елиминираат внатрешните бариери. Словенија го спроведуваше овој пограничен надзор уште од октомври 2023 година поради бранот нестабилност на Блискиот Исток и страв од терористички закани, по примерот на Италија која тогаш воведе контроли кон Словенија.
Ова олеснување на пограничниот режим симболично се совпаѓа и со почетокот на целосната примена на Новиот пакт на ЕУ за миграции i азил, кој стапува на сила в петок, иако министерот Матоз изрази незадоволство што претходното раководство на министерството не успеало навреме да го подготви соодветниот домашен законски рамковник, па словенечките служби привремено ќе мора да се потпрат на постојните закони за меѓународна заштита.
