Оваа година се одбележуваат 55 години од испраќањето на првата е-пошта, момент што засекогаш ја промени дигиталната комуникација. Иако содржината на првата порака е „заборавена“, нејзиниот автор, инженерот Реј Томлинсон, остави траен белег во историјата со изборот на еден симбол – @.
Денес, 23 април, се слави како Ден на е-поштата датум кој се поврзува со роденденот на Томлинсон и се користи како повод да се оддаде почит на неговиот изум.
Од трговија до интернет
Симболот @, познат како „ет-знак“, денес е еден од најпрепознатливите знаци во светот. Во е-поштата ја има клучната улога – го одвојува корисничкото име од серверот (пример: korisnik@server.com), но неговата приказна започнува многу пред интернетот.
Уште во средниот век, @ се користел во трговијата како кратенка за „по цена од“. Во 16 век, италијанските трговци го користеле како мерна единица за амфора, додека во Шпанија и Португалија „ароба“ означувала тежинска мерка.
Пресвртниот момент: 1971 година
Клучниот момент доаѓа во 1971 година, кога Томлинсон работел на мрежата ARPANET – претходникот на интернетот. Тој барал симбол што нема да создаде забуна и ќе означува локација. Изборот паднал на @, бидејќи природно го означува значењето „на“ или „кај“.
Така настанала првата е-пошта – и почетокот на дигиталната ера.
Денес @ не е само дел од е-поштата. Се користи на социјалните мрежи за означување на корисници, во програмирање (на пример во Python или Java), но и во секојдневна комуникација како симбол на дигиталниот свет.
Неговата форма инспирирала и логотипи на модерни платформи, а во културна смисла станал глобален симбол на поврзаност.
Симбол со многу имиња
Интересно е што @ има различни имиња низ светот, често инспирирани од животни или форми:
- Италијански: „полжав“
- Германски: „мајмун“
- Руски: „мало куче“
- Грчки: „мала патка“
- Фински: „опашка од мачка“
Овие имиња покажуваат како еден технички знак станал дел од културата и јазикот ширум светот.
