Во ек на пожарите во Хрватска од полициско возило во движење фрлен отпушок

Обединетите Арапски Емирати до понатамошно ги суспендираа трговијата, размената и финансиските трансакции со Иран поради регионалната ескалација.

На социјалните мрежи и хрватските медиуми се појави снимка за која се тврди дека е направена на островот Угљан, а на која се гледа како од службено полициско возило во движење на патот е фрлен отпушок од цигара.

Од самата снимка не може да се утврди кој го фрлил отпушокот, ниту дали станува збор за полициски службеник. Снимката се појавува во екот на пожарната сезона, кога надлежните постојано предупредуваат на опасноста од предизвикување и ширење пожари.

Снимката до порталот Morski.hr ја испратил читател, кој тврди дека отпушокот го фрлил полицаец.

„Сметам дека ваквото однесување е особено проблематично токму затоа што станува збор за службено лице кое треба да биде пример за одговорно однесување и почитување на прописите“, навел читателот.

Од Morski.hr соопштиле дека снимката ја испратиле до Задарската полициска управа и побарале објаснување за случајот, како и одговор дали против одговорното лице ќе биде покрената дисциплинска постапка. До објавувањето на текстот, одговор од полицијата не бил објавен.

За фрлање отпушок следува казна од 130 евра

Хрватскиот Закон за безбедност на сообраќајот на патиштата забранува фрлање отпад, предмети и материи што можат да ја попречат или загрозат безбедноста на сообраќајот или да ја загадат и загрозат животната средина. За прекршување на оваа одредба е предвидена глоба од 130 евра.

Но, последиците можат да бидат многу посериозни доколку отпушокот предизвика пожар.

Ако пожарот го загрози животот или телото на луѓе или имот од поголем обем, може да станува збор и за кривично дело предизвикување опасност за животот и имотот со општоопасно дејствие или средство.

За такво дело е предвидена казна од шест месеци до пет години затвор, односно до три години доколку е сторено од небрежност.

Во сезона во која Хрватска се соочува со голем број пожари, снимката повторно го отвора прашањето за одговорноста при фрлањето отпушоци покрај патиштата.