Извршниот директор на Volkswagen, Оливер Блуме, во својот говор на годишното собрание на компанијата предупреди дека автомобилскиот гигант се соочува со зголемени ризици и силни глобални економски притисоци. Според него, најголемиот предизвик за компанијата останува намалувањето на трошоците, во услови на нестабилен пазар, трговски тензии и силна конкуренција, особено во Кина и САД.

Иако Блуме истакна одредени успеси, како лидерската позиција во европскиот пазар на електрични возила и новите модели за азискиот пазар, тој нагласи дека тоа не е доволно за долгорочна стабилност. Аналитичарите сметаат дека Volkswagen мора истовремено да ги намалува трошоците и да развива поатрактивни и поконкурентни производи.

Во рамки на веќе постоечките програми за реструктуирање, компанијата планира значително намалување на работната сила. До 2030 година се очекува укинување на десетици илјади работни места во различни брендови во рамки на групацијата, вклучувајќи Volkswagen, Porsche и Audi, каде дел од отпуштањата веќе се реализирани преку доброволни програми.

Синдикатите и работничките претставници најавуваат отпор на евентуални дополнителни кратења, нагласувајќи дека ќе се борат за сигурни работни места и стабилни услови за вработените. Во исто време, експертите предупредуваат дека проблемите на компанијата не се само финансиски, туку и структурни, поврзани со управувањето и бавната адаптација кон новите технологии.

Volkswagen сега се соочува со период на тешки одлуки, во кој ќе мора да балансира меѓу намалување на трошоците, инвестиции во иновации и зачувување на работните места во услови на се поостра глобална конкуренција.