Северна Кореја тестираше новоразвиен лесен повеќенаменски систем за лансирање проектили и повеќе тактички крстосувачки ракети, објави државната агенција КЦНА. Тестирањата биле изведени во вторник, под директен надзор на севернокорејскиот лидер Ким Џонг Ун.

Јужнокорејската војска претходно соопшти дека Пјонгјанг истрелал неколку проектили, вклучувајќи најмалку една балистичка ракета со краток дострел, кон западните води. Според јужнокорејските проценки, дел од проектилите летале околу 80 километри, а се анализираат нивните спецификации и дострел.

Северна Кореја зборува за модернизација на оружјето

Според КЦНА, тестирањата биле дел од планот за модернизација на артилериските и ракетните сили и за исполнување на петгодишната цел за развој на националната одбрана. Биле проверувани боеви глави за тактички балистички ракети, артилериски ракети со продолжен дострел и крстосувачки ракети со прецизна навигација и елементи на вештачка интелигенција.

Ким Џонг Ун ги пофалил тестирањата, оценувајќи дека тие покажуваат технички напредок во зајакнувањето на борбената моќ на Северна Кореја. Според AP, Пјонгјанг тврди дека новите системи треба да ја подобрат способноста на земјата за тактичко дејствување и модерна војна.

Ова е осмо тестирање балистички проектили од страна на Северна Кореја годинава. Последното истрелување на ракети со краток дострел беше регистрирано на 19 април, а новото тестирање дополнително ги зголемува тензиите на Корејскиот Полуостров.

Сеул повторно го повика Пјонгјанг да одговори на напорите за намалување на тензиите и за мир на полуостровот. Но новите тестирања покажуваат дека Северна Кореја продолжува да ја забрзува модернизацијата на својот ракетен арсенал, и покрај меѓународните предупредувања.